Kijanw ka pwoteje tèt ou kont Kovid 19 ?

Kovid 19 se yon tip Kowonaviris k ap vale teren nan mond lan depi fen desanm 2019 e ki pran nesans nan peyi Lachin. Li bay plizyè sentom tankou : fyèv, tous, souf kout, lestomak fè mal, batman kè, zo fè mal, pa pran gou, pa pran sant anyen ak lòt sentom ki pa parèt souvan tankou konjonktivit (azoumounou) oswa dyare. 5 mwa apre, Kovid 19 toujou rete yon defi pou tout pi gwo save ki egziste nan mond lan paske yo poko kapab jwenn bon jan remèd pou li. Men yo dekouri divès fason nou kapab ralanti kous maladi an ki se diminye kontak fizik yo ki mande pou gade distans 1 m jiska 2 m ant chak moun oswa rete lakay nou. Li enpotan tou pou n toujou mete mask lè nap soti epi tou lave men nou souvan. Gen plizye tip mask, men pa bò isit nou plis itilize sa ki an twal yo ak bandana, men wap jwenn kek moun ki mete sa ki an plastik, sa ki rele N95 lan épi tou sa ki fèt an Kabòn ke yo rele tou N99. Lè nap mete mask toujou sonje fok li byen ranje nan vizaj nou pou rasin nen an jiska manton an byen kouvri. Sonje menm si nou tou 2 gen mask toujou kenbe yon distans fizik ant nou paske lè n konsidere mask nou plis itilize yo pa bloke tout mikrob yo e li posib pou yon kantite mikrob travese mask lan al jwenn lòt moun nan tou. Pa desann mask lan lè n ap pale nan telefon oswa ak moun ki bò kote n lan. Pa mete mask lan yon fason pou nen nou ak bouch nou ta deyò. Evite manyen mask lan tanzantan lè w nan lari epi pa metel nan poch nou pou n reyitilize anko. Kovid 19 se yon reyalite pa minimize sentom yo. Siw ta santi yo cheche wè ak doktè pou w ka fè tès ak evalyasyon jeneral pou w pa viktim si sa ta vin grav pou ou, epi tou sa ap edew pwoteje moun ki pwoch ou yo e ki pi fragil pasew. Atansyon pa kapon ann rete veyatif !!

Dr Varin Herode, MD